Na AV Ancos dan continuidade o seu ciclo Os Martes da Memoria. Este vindeiro martes 10 preséntase o ensaio biográfico de Juan Galán  "Rotspanier" onde o autor recolle a peripecia vital do miliciano Joaquín Fernandez Millán que foi man de obra forzada para a Organización Todt na construcción do Muro Atlántico. O acompaña  Virginia Fernández, neta do biografiado.

Lembrade, local da asociación, a partires das 19:30 o Martes 10 de maio. Entrada libre.

ROTSPANIER

Rotspanier, un miliciano galego no exilio francés (1939‑1945) é un libro de investigación histórica a cargo de de Juan Galán que reconstrúe a vida dun republicano galego durante a Guerra Civil española e o exilio posterior en Francia. O libro conta a historia real de Joaquín Fernández Millán, mariñeiro da Pobra do Caramiñal, que nos anos 1920 emigra ao País Vasco para traballar. Cando comeza a Guerra Civil Española, únese ás forzas republicanas e combate como miliciano no Exército de Euskadi.

Cando a guerra remata coa vitoria franquista en 1939, como miles de republicanos, Joaquín cruza os Pireneos cara a Francia para escapar da represión. Alí comeza unha etapa moi dura: é internado en campos de concentración franceses para refuxiados españois para máis tarde ser obrigado a traballar en compañías de traballo forzado (CTE e GTE) baixo o goberno de Vichy. Posteriormente pasa a traballar para a Organización Todt, controlada pola Alemaña nazi, na construción do Muro Atlántico durante a Segunda Guerra Mundial.

O título “Rotspanier” significa literalmente “españois vermellos” era o nome que os alemáns empregaban para referirse aos republicanos españois exiliados que foron utilizados como man de obra forzada.

O libro recupera a necesaria memoria histórica dos republicanos galegos exiliados e mostra a liña contínua que vai dende a derrota na Guerra de España ó traballo forzado baixo o nazismo.