Nas últimas semanas estase a gravar un conflito laboral no CRAEGA (Consello Regulador da Agricultura Ecolóxica de Galicia), protagonizado por traballadores que foron trasladados de xeito forzoso dende Monforte de Lemos a Lugo. 

Varias sentenzas xudiciais deronlles a razón, o que levou ao Sindicato Labrego Galego (SLG) a alzar a voz alertando sobre as consecuencias deste conflito non só para o persoal, senón para todo o sector ecolóxico galego.

Que é o CRAEGA

O CRAEGA é o organismo público de Galicia encargado de certificar os produtos ecolóxicos. Podes visita-la web do CRAEGA eiquí

Está formado por representantes do sector agrario, comercialización, elaboración e a propia administración, e a súa misión inclúe auditar, xestionar o rexistro de operadores ecolóxicos e promover a produción ecolóxica. Ademais, ten acreditación ENAC para dar garantías sobre o control da produción ecolóxica. 

A orixe do conflito

O conflito xurdiu logo dunha decisión do CRAEGA de trasladar parte dos seus traballadores dende Monforte de Lemos a Lugo. Segundo varios medios, este traslado foi imposto por parte da dirección e afectou a varios empregados, que denunciaron que non se respectaron as súas condicións de traballo.  Algúns traballadores levaron a entidade ós tribunais e gañaron: o traslado foi declarado improcedente polos xulgados do Social de Lugo. Segundo a sentenza, o CRAEGA modificou de modo substancial as condicións laborais (distancia, conciliación, etc.) sen unha causa xustificada legalmente (económica, técnica, organizativa...). 

Claves do asunto

• Traslados forzosos: A imposición dun cambio de sede para varios traballadores, desde Monforte a Lugo, sen negociación aparente, é o eixo central da disputa.
• Xustiza laboral: As sentenzas xudiciais que deron a razón a traballadores avalan que o traslado foi inxustificado e vulnerou os seus dereitos laborais.
• Risco para a agricultura ecolóxica: Diversos productores e o SLG advirten que a inestabilidade laboral pon en risco o funcionamento normal do CRAEGA, esencial para certificar e apoiar os operadores ecolóxicos. 
• Obxectivos europeos en perigo: Galicia só ten un 4 % da súa superficie agraria certificada como ecolóxica, mentres que a Unión Europea marca como meta chegar ao 25 % para o 2030. O SLG cre que este conflito pode dificultar seriamente o cumprimento dese obxectivo. 
• Servizo esencial: Os empregados do CRAEGA non son simplemente administrativos, senón que son os que manteñen contacto directo cos operadores ecolóxicos, facendo labores de inspección, certificación e asesoramento. Se están de baixa ou afastados, o servizo que reciben as explotacións ecolóxicas pode verse deteriorado. 

Sindicato Labrego

O SLG expresou a súa preocupación de forma pública e insistiu en que o conflito non é só unha cuestión interna do CRAEGA, senón un asunto de importancia estrutural para a agricultura ecolóxica galega. No seu comunicado, o sindicato afirma que o CRAEGA é un organismo fundamental para a promoción e certificación da produción ecolóxica, polo que a súa correcta xestión laboral repercute directamente no sector. O sindicato, reclama solucións inmediatas para garantir o benestar das persoas traballadoras e evitar que o conflito laboral se prolongue e se converta nun freo para a transición agroecolóxica. O SLG tamén pon de relevo que non se pode permitir que “conflitos de índole laboral e de xestión institucional poñan en risco” un sector estratéxico para Galicia. 

Por que cómpre defender a posición dos traballadores?

Dende unha perspectiva de xustiza laboral, os traballadores están a defender non só os seus dereitos individuais, como a conciliación, a estabilidade no posto ou a non imposición de traslados arbitrarios, senón tamén unha visión máis ampla: garantir que o CRAEGA poida funcionar con normalidade e profesionalidade, algo esencial para que o sistema de certificación ecolóxica siga servindo ao sector agrario galego.

Se o conflito non se resolve, podería deteriorarse a calidade dos servizos do CRAEGA, afectar a credibilidade do selo ecolóxico galego e, a medio prazo, ralentizar o crecemento da agricultura ecolóxica en Galicia. Isto repercute non só nas persoas traballadoras, senón sobre os produtores ecolóxicos e, en última instancia, sobre o modelo agroalimentario galego.