O goberno do concello avisaba hoxe martes ás 14:30 que mañá mércores 18, a empresa concesionaria do servizo municipal de augas VEOLIA (antes VIAQUA) vai interromper o subministro de auga na zona de Xuvia por traballos de mellora na rede.

Tras dez anos reclamando o contrato de concesión do servizo de auga, por fin o temos nas máns e así, dende MOVENEDA, podemos analizalo e trasladar ós veciños información de interese. Unha das cousas que revisamos é cando a concesionaria pode cortar a auga, e sobre todo, como e cando está obrigada a avisarnos.

QUE DI O CONTRATO EXACTAMENTE?

O Artigo 11º do Prego de Condicións Económico-Administrativas, que forma parte do contrato asinado en 1993 entre o Concello de Neda e AQUAGEST (logo VIAQUA, agora VEOLIA), regula o servizo e establece que a concesionaria pode interromper o subministro en tres casos:

1. Por obras de reforzo ou extensión da rede e instalación de acometidas.
2. Por paros de urxencia para reparar avarías que non admitan demora.
3. Por imposibilidade de obter auga suficiente.

O Prego tamén recolle que a Concesionaria está obrigada de avisar ós veciños afectados nos seguintes casos:

1. Cando haxa unha interrupción por obras programadas na rede.
2. Cando un corte de urxencia se prolongue previsiblemente máis de cinco horas.

O aviso non pode ser calquera xeito: o contrato establece expresamente que debe facerse mediante anuncios na prensa e na emisora local de radio, ou por calquera outro medio que resulte útil e práctico.

Isto significa que cada vez que VEOLIA corta a auga para facer obras ou reparacións importantes, ten obriga contractual de publicalo nos medios. Non é unha práctica voluntaria: é unha obriga asinada co Concello de Neda. 

QUE VAI FACER MOVENEDA?

Dende MOVENEDA pensamos que avisar o día anterior dun traballo programado non é suficiente. Pensamos tamén que o contrato é claro que o concello debe vixiar o seu cumprimento e cerciorarse se VEOLIA publica anuncios nos xornais, na radio e outros medios que se consideren oportunos.

Entendemos que é fundamental que o goberno municipal exerza o seu papel de control. O contrato contempla expresamente a creación dunha Comisión de Seguimento e Control do Servizo (Artigo 2º), presidida polo Alcalde ou Concelleiro de Augas, precisamente para fiscalizar a xestión da concesionaria.

Por iso, MOVENEDA vai dirixirse ao goberno do Concello de Neda para preguntar:

• Se se vixía que VEOLIA cumpre a súa obriga de avisar aos veciños nos cortes de auga.
• Se a Comisión de Seguimento e Control do Servizo está constituída e funciona con regularidade.
• Que medidas se toman cando a concesionaria non cumpre as obrigacións contractuais.

Os veciños de Neda levamos décadas pagando polo servizo de auga a unha empresa privada que se lucra deste contrato. Toca asegurarnos de que se cumpre o pactado.

MOVENEDA seguirá analizando o contrato e informando sobre os dereitos dos veciños e as obrigacións da concesionaria.