O Concello de Padrón adquiriu un camión auxiliar eléctrico para a recollida de residuos, segundo recollen medios como El Correo Gallego. O vehículo foi financiado maioritariamente con fondos europeos NextGenerationEU, xestionados pola Xunta de Galicia.

Do custe total, 114.048€ proceden de fondos europeos, mentres que o goberno padronés asume tan só uns 10.580€. Esta actuación pretende millorar a xestión de residuos, reforzar a recollida separada de materia orgánica e xerar un modelo máis sostible.

Este exemplo demostra que, con iniciativa, vontade política e gañas de traballar, é posible captar recursos externos para modernizar servizos municipais sen asumir custos sobre a veciñanza.

NEDA: ANOS PERDENDO OPORTUNIDADES

Dende MOVENEDA levamos meses advertindo ó goberno de Neda que está a deixar pasar convocatorias de axudas que permitirían mellorar dotacións e crear novos servizos.

En distintas publicacións xa sinalamos:

• O “penoso balance” con cero novas dotacións e servizos do goberno municipal.
• A perda de oportunidades mentres outros concellos si aproveitan liñas de financiamento da Xunta e da Unión Europea.
• A posibilidade de impulsar iniciativas como un Punto Limpo Móbil, financiable a través de convocatorias autonómicas.

Mentres outros municipios presentan proxectos e captan fondos, en Neda continúan sen materializarse propostas que mellorarían a calidade de vida da veciñanza.

PASOTISMO FRENTE A PROPOSTAS CONSTRUCTIVAS E DE FUTURO

Neste caso concreto, Padrón é exemplo de xestión activa: detectar unha necesidade, presentar un proxecto, solicitar financiamento e executalo.

En contraste, o goberno de Neda amosa inacción e pasotismo, limitándose á xestión ordinaria sen ambición nin planificación para captar recursos externos. Esta falta de iniciativa tradúcese en menos servizos, menos investimentos e menos oportunidades para o noso concello.

Dende MOVENEDA defendemos unha política municipal proactiva, capaz de:

• Presentar proxectos ás convocatorias abertas.
• Planificar investimentos estratéxicos.
• Apostar por servizos ambientais modernos.
• Aproveitar ao máximo os fondos europeos e autonómicos dispoñibles.

Neda non pode resignarse a quedar atrás mentres outros concellos avanzan. É cuestión de vontade, planificación e compromiso coa veciñanza. O goberno de Alvariño carece destas tres facultades.