MOVENEDA valora moi positivamente o reinicio do Plan Aloumiños por parte da Xunta de Galicia, unha iniciativa de dinamización social e acompañamento de persoas maiores, veciños e veciñas en situación de illamento social ou persoas que, por localización ou circunstancias persoais, sofren situacións de soidade non desexada.

O programa, xa se desenvolveu en Neda o pasado ano e ten como obxectivo favorecer a saúde psicosocial dunha parte da veciñanza especialmente vulnerable. Desde MOVENEDA consideramos que se trata dunha ferramenta útil, necesaria e profundamente positiva.

A SAUDE PSICOSOCIAL PRECISA ESTABILIDADE NO TEMPO

Tamén entendemos que o principal problema deste plan segue a ser a súa escasa duración e temporalidade. A Xunta establece partidas insuficientes. Isto provoca que o servizo só funciona durante uns poucos meses ao ano, interrompendo dinámicas sociais e vínculos persoais que precisamente necesitan de continuidade e estabilidade no tempo.

A saúde psicosocial non pode tratarse como se fose un interruptor que se acende e se apaga segundo exista ou non financiamento. Os participantes neste tipo de programas precisan apoio constante, acompañamento continuado e políticas públicas que entendan a importancia da socialización e da prevención da soidade.

MOVENEDA PROPUXO QUE O CONCELLO CONTINUASE O PROGRAMA

Precisamente por iso, cando o Plan Aloumiños rematou o pasado ano, MOVENEDA solicitou que o goberno de Neda asumise temporalmente a continuidade do programa cos seus propios recursos, tal e como fixeron concellos veciños como o de San Sadurniño. A resposta da alcaldía foi unha negativa absoluta, sen vontade de diálogo nin explicacións convincentes.

Agora que a Xunta volve poñer o programa en marcha, desde MOVENEDA queremos lanzar preguntas claras: 

• que acontecerá cando este financiamento remate de novo?

• Volverán quedar abandonadas as persoas que máis precisan este apoio?

UN COMPROMISO COS VECIÑOS QUE MAIS O NECESITAN

Por este motivo, MOVENEDA levará novamente ás comisións de área e aos plenos municipais unha proposta: que o goberno de Alvariño se poña xa a traballar nun plan de continuidade. Os veciños que formamos MOVENEDA pensamos que o goberno municipal debe iniciar xa contactos con empresas e profesionais do ámbito da animación e intervención psicosocial para garantir que, unha vez finalizado o programa financiado pola Xunta, o Concello poida manter o servizo activo.

Desde MOVENEDA entendemos que esta é unha proposta razoable, útil e beneficiosa para a veciñanza. Resultará moi difícil comprender que Alvariño rexeite investir nun programa de acompañamento social mentres destina recursos económicos a outros gastos moito menos prioritarios para o benestar real da cidadanía.

A nosa prioridade é clara: poñer ás persoas no centro e defender políticas públicas que melloren a vida da veciñanza de Neda, especialmente daqueles veciños e veciñas que máis apoio precisan.