En datas recente teñen chegado a MOVENEDA múltiples queixas de veciños e veciñas do municipio de Neda, denunciando o acceso en propiedades privadas e roubos de ferramentas, equipos e outros bens.

Ante a reiteración destes feitos pode crear un clima de alarma e inseguridade entre os veciños e veciñas e por iso vimos de urxir ó alcalde a que convoque de urxencia a Xunta Local de Seguridade para avaliar e adoptar con celeridade as medidas necesarias para protexer á cidadanía.

XUNTA LOCAL DE SEGURIDADE

A devandita Xunta está presidida polo Alcalde e integrada polas Forzas e Corpos de Seguridade con presenza no municipio. A súa misión é coordinar as actuacións en materia de seguridade cidadá.

OUTRAS MEDIDAS PROPOSTAS POR MOVENEDA

Dende MOVENEDA tamén solicitamos que se incremente a presenza e vixilancia policial na zona das Augas e nas demais áreas do municipio nas que se rexistraron incidencias, así como facer unha campaña de comunicación pública, efectiva e de amplo alcance, a través de todos os canles dispoñibles (radio, tv, prensa, páxina web municipal e redes sociais oficiais do Concello), dirixida a informar a poboación con:

• Medidas básicas de auto-protección de persoas e propiedades.
• Teléfono de contacto da Policía Local de Neda para comunicar movementos sospeitosos ou roubos.
• Teléfono de contacto do Posto da Garda Civil para os mesmos efectos.
• Indicacións claras sobre como denunciar formalmente calquera feito delitivo.

No improbable caso que esta alcaldía decida non convocar con carácter urxente e extraordinario a Xunta Local de Seguridade de Neda, pedimos que se nos comuniquen os criterios e razoamentos que levan a esta alcaldía a tomar tal decisión.