O xornal a Voz de Galicia publicou hai días un artigo afirmando que "Un mapa del Gobierno alerta de gravísimas inundaciones en la ría de Ferrol dentro de diez años". 

Pensamos que este tipo de titulares non son o máis indicado. O alarmismo e o sensacionalismo perxudica ós veciños afectados. Se as súas propiedades estan marcadas polas desgrazas pasadas, semellante titular anunciando inundacións en dez anos só contribúe a que o valor das súas casas baixe ainda máis.

Se suxire unha ameaza global na ría de Ferrol pero non se predín feitos concretos nun prazo fixo

A realidade é que os mapas de risco publicados polo MITECO (Ministerio para la Transición Ecológica y el Reto Demográfico) sinalan áreas moi concretas en Ferrol, Narón e Neda. 

Non é certo que falen dun desastre inevitable para toda a ría. Este tipo de simplificacións contribúen a xerar medo, non a informar.

O artigo tampouco reflicte con fidelidade a función real destes mapas: describir escenarios de perigosidade baseados en estatísticas, sinalando zonas específicas de risco baixo determinadas condicións. Non afirman que vaia haber "unha inundación gravísima en dez anos”. Confundir probabilidade e profecía é un recurso sensacionalista, pero pouco responsable.

Rigor xornalístico

Por último, titulares así ocultan o verdadeiramente importante: sinalar e entender os riscos de maneira rigorosa, actuar con planificación e trasladar mensaxes e información claras á cidadanía. Os veciños de concellos que sufrimos inundacións, necesitamos información útil, non alarmismo.

Cal é a realidade?

Estes mapas forman parte dun proceso europeo, elaborado cada seis anos por todos os estados da UE, que revisa e actualiza riscos. Non é unha alerta nova nin tampouco unha advertencia extraordinaria. Presentalo así é distorsionar o contexto para provocar impacto.

Os mapas do Goberno de España e a Xunta de Galicia confirman o que os veciños xa sabemos: Neda é unha das zonas con meirande risco de inundación na ría de Ferrol. As conclusións e as mensaxes resultantes deberían ser positivas: son riscos xa coñecidos e administracións como Concello de Neda e Xunta de Galicia deberían estar xa traballando coordinadamente en mellorar a prevención e eliminar riscos.

Estes estudos deben ser ben entendidos.

Dende MOVENEDA pensamos que a información que nos brindan os mapas axudan a actuar con responsabilidade e previsión.

Estes Mapas de Peligrosidade e Risco de Inundación son unha ferramenta util que permite anticipar, calcular riscos e tomar medidas. Se Neda tivese un goberno responsable, estas alertas serían vistas como unha oportunidade para planificar as defensas, obras de infraestruturas e medidas de prevención.

O mesmo acontece coa Xunta. Se o Partido Popular non usase a Augas de Galicia de xeito electoralista e clientelista, podería estar xa traballando coordinadamente co Concello en plans e medidas eficaces para paliar e mesmo atallar as inundacións.

Pero para que isto ocurra é necesario ter gobernos que actúen de xeito responsable e previsor.

Principais claves

• • Actualización dos mapas oficiais: o MITECO está revisando os mapas de perigosidade e risco de inundación, co obxectivo de incorporar escenarios máis realistas. 
    
    
  • Escenarios detallados: os mapas inclúen distintas probabilidades de inundación (tendo en conta caudais, profundidades, velocidade), e estiman posibles danos (poboación, patrimonio, actividades). 
    
    
  • Risco local en Galicia: segundo a Xunta, hai concellos moi vulnerables, como Neda, especialmente en ríos, e para algunhas zonas concíbese un risco elevado.
    
    
  • Alerta concreta para Neda: o novo mapa sinala certos puntos de risco na Ría de Ferrol. 
    
    
  • Consulta pública: os novos mapas están en fase de consulta pública, o que permite á cidadanía, o Goberno Municial e ós veciños de Neda, informarse, participar e facer aportacións e alegacións.