O concello cifra en 2.800 visitantes os que se achegaron á Oficina de Turismo de Neda. Un servizo que se pon en marcha únicamente no verán e porque o financia a Deputación

Unha vez que pasa a época estival, pecha, deixando sen información ós visitantes e peregrinos que veñen tarde, nos meses de outubro e novembro.

O 62% foron peregrinos

A tempada pechou a mediados de outubro cun balance de 2.831 visitantes, o 62% deles peregrinos do Camiño Inglés que pernoctaron no albergue da localidade. En setembro pasaron polo este punto de atención ao visitante 785 persoas, mentres que en agosto o fixeron 900. 

Moveneda propón que abra todo o ano

A apertura durante todo o ano da Oficina de Turismo de Neda é fundamental para potenciar o desenvolvemento económico, cultural e turístico do concello.

Neda é unha parada estratéxica no Camiño Inglés, unha ruta cada vez máis frecuentada por peregrinos nacionais e internacionais en calquera época do ano.

Manter a oficina aberta todo o ano permitiría ofrecer información actualizada, promover as visitas ós recursos patrimoniais, naturais e gastronómicos do noso concello, e apoiar así ó pequeno comercio e á hostelaría local. Ademais, garantiría unha atención continua aos visitantes e reforzaría a imaxe de Neda como destino acolledor e preparado.

O turismo non debe limitarse ao verán: cada estación ofrece oportunidades únicas para descubrir o territorio e dinamizar a economía. Pechar a oficina parte do ano supón perder visitantes, visibilidade e ingresos. A continuidade do servizo é, polo tanto, un investimento de futuro para Neda e para a proxección do Camiño Inglés como ruta viva e activa todo o ano.

Na estación do tren ou na Casa de Augas

Aparte de propoñer extender o servizo da oficina todo o ano, MOVENEDA tamén lanzou a idea de pedir a ADIF a transferencia ou cesión da Estación do Tren, ou á Mariña da Casa de Augas, e situar nun deses edificios dita Oficina Permanente de Turismo.

Como sempre, o goberno de Alvariño négase a debater calquera proposta ou idea que non saia deles.

Nula información á oposición

Tamén xa é usual que a concelleira de turismo non facilite á oposición un informe detallado. Este ano volveremos reclamalo.