Tal e como xa informamos hai uns dias, o goberno ven de tomar progresivamente medidas ante o avance da gripe aviar. Primeiro foron peches da cabaña avicola por concellos e provincias, pero agora é un peche total

Que está a pasar?

O goberno español activou medidas de emerxencia ante o repunte dos brotes de gripe aviar (virus H5N1) en Europa e España. A detección de varias explotacións infectadas, xunto con aves silvestres migratorias afectadas e que espallan a enfermidade, eleva o risco de propagación. 

Que ordes deron as administracións competentes?

O Ministerio de Agricultura, Pesca e Alimentación declarou o confinamento obrigado de todas as explotacións de aves de corral criadas ao aire libre. A orde, publicada no Boletín Oficial do Estado, inclúe granxas ecolóxicas, para autoconsumo e aquelas que venden directamente ovos ou carne. 

Tamén se prohibe convivir especies como patos ou gansos con outras aves, o uso de auga de fontes que poidan estar contaminadas por aves silvestres sen tratar, e celebracións con aves (feiras, exposicións, eventos culturais). 

Se non é posible encerrar totalmente as aves, as autoridades poden permitir que estean ao aire libre só se se instalan redes ou dispositivos que impidan o contacto con aves silvestres. 

Por que se pecha a poboación avícola?

A razón principal é evitar o contacto entre aves domésticas e aves migratorias infectadas, que son un vector clave para o virus.  A gripe aviar é altamente contaxiosa entre aves e pode causar graves perdas nas granxas, polo que se toman estas medidas para reforzar a bioseguridade. 

Canto pode durar esta situación?

Non se fixo público un prazo concreto para o fin do confinamento. Segundo o Ministerio, as medidas son temporais e preventivas, pero dependerán da evolución dos brotes e do risco epidemiolóxico.