Desta volta é nas zonas do Cal e Alcallás, onde os veciños denuncian que levan 16 dias sen iluminación e que, por riba, o goberno do Concello non fixo nada.

Estas novas zonas afectadas por cortes na luz pública se suman ás que levamos denunciando dende decembro en zonas de Anca e Fontevella.

Xa daquela, levamos o asunto á Comisión de Servicios onde preguntamos ó señor concelleiro por eses continuos cortes de luz.

"NO SE PUEDE HACER NADA, HAI QUE ACOSTUMBRARSE"

Foi precisamente nesta comisión onde recibimos a delirante resposta de Angel García Cordero:

- "No se puede hacer nada porque hay cortes en todos lados y que es algo que no se puede controlar y que hay que acostumbrarse"

O GOBERNO DE ALVARIÑO: EVASIVAS, EXCUSAS E NINGUNHA SOLUCION

Ante esta situación, MOVENEDA trasladou o asunto ao Pleno municipal, esixindo respostas e medidas concretas. A respostas recibidas foron, cando menos, indignantes. O alcalde Ángel Alvariño aproveitou a súa intervención no Pleno para despegar un amplo repertorio de evasivas e desculpas, sen achegar nin un só compromiso concreto nin un prazo de actuación.

Xa pasaron máis de tres meses dende as primeiras denuncias. As queixas non cesaron: multiplicáronse. E o goberno municipal segue sen dar sinais de que este asunto lle mereza a atención que require. Para MOVENEDA, isto non é un problema técnico puntual: é a expresión dunha indolencia sistemática e dunha incapacidade de xestión que non pode seguir tolerándose.

AS PROPOSTAS DE MOVENEDA: SOLUCIÓNS REAIS PARA UN PROBLEMA REAL

MOVENEDA non só denuncia: propón. Esiximos ao goberno municipal que adopte de xeito inmediato as seguintes medidas:

1. Adoptar un sistema de avisos fiable e con rendición de contas. O Concello debe habilitar un mecanismo accesible e verificable para que calquera veciño poida comunicar incidencias no alumeado público, recibir un acuse de recibo do seu aviso e ter garantido que o responsable municipal dará resposta nun prazo razoable e deberá render contas das actuacións realizadas ou das razóns polas que non se actuou.
   
   
2. Revisión dos contratos de mantemento. O goberno municipal debe revisar en profundidade os contratos vixentes coas empresas encargadas do mantemento do alumeado público, verificar o seu cumprimento e, se procede, esixir responsabilidades ou renegociar as condicións para garantir un servizo digno.
   
   
3. Incremento do investimento en infraestruturas e mantemento. Non é posible manter un servizo de calidade sen destinar os recursos necesarios. MOVENEDA esixe que o goberno local aumente o investimento en infraestruturas de alumeado, especialmente nas zonas rurais e periféricas do municipio, que son as que sofren de xeito máis recorrente estes cortes.

ADVERTENCIA CLARA Ó GOBERNO DE ALVARIÑO

MOVENEDA quere ser inequívoca: se o goberno municipal non adopta medidas efectivas e a situación non mellora de xeito constatable, esixiremos o cese inmediato do Concelleiro Ángel García Cordero. Un cargo público que non é capaz de garantir un servizo tan básico como a iluminación das rúas, e que ademais responde ás queixas dos veciños con chulería, pasotismo e desdén, non está en condicións de seguir exercendo as súas funcións.

Os veciños de Neda merecemos un goberno que traballe para nos. Mentres ese goberno non chega, MOVENEDA seguirá denunciando, esixindo e dando voz ás queixas dos veciños.